اسلام آباد: (رائیٹ ناوٴ نیوز) وزیراعظم کے مشیر رانا ثنا اللہ نے کہا ہے کہ پٹرول بحران حکومت کا پیدا کردہ نہیں اور حکومت عوام کو ریلیف دینے کے لیے اقدامات کر رہی ہے۔ انہوں نے اسلام آباد میں میڈیا سے گفتگو کرتے ہوئے بتایا کہ عالمی سطح پر پٹرولیم مصنوعات کی قیمتوں میں اضافہ ہو رہا ہے۔

رانا ثنا اللہ نے مزید کہا کہ پاکستان بھی عالمی بحران سے متاثر ہو رہا ہے اور حکومت عوام کو ٹارگٹڈ سبسڈی فراہم کر رہی ہے۔ انہوں نے کہا کہ دنیا کے کئی ممالک میں پٹرول اور ڈیزل دستیاب نہیں ہے اور لوگ لمبی لائنوں میں کھڑے ہیں۔

مشیر وزیراعظم نے کہا کہ حکومت کفایت شعاری اقدامات پر عمل پیرا ہے اور بروقت اقدامات کرکے پٹرولیم کی فراہمی یقینی بنائی گئی ہے۔ انہوں نے عوام کو مشورہ دیا کہ وہ مثبت کردار ادا کریں اور احتجاج کرکے ملک کو کمزور نہ کریں۔

رانا ثنا اللہ نے کہا کہ حکومت اس بحران سے باوقار قوم کی طرح نکلے گی اور کچھ عناصر موجودہ حالات میں عوام کو گمراہ کرنے کی کوشش کر رہے ہیں۔ انہوں نے کہا کہ عالمی سطح پر قیمتیں ایران جنگ کی وجہ سے بڑھی ہوئی ہیں۔

واضح رہے کہ حالیہ دنوں میں عالمی مارکیٹ میں پٹرولیم مصنوعات کی قیمتوں میں اضافہ ہوا ہے جس سے پاکستان سمیت کئی ممالک متاثر ہو رہے ہیں۔