زیورخ: (رائیٹ ناوٴ نیوز) سوئٹزرلینڈ نے امریکا سے پیٹریاٹ میزائل دفاعی نظام کی خریداری کے لیے ادائیگیاں روکنے کا فیصلہ کیا ہے۔ سوئس حکومت نے کہا ہے کہ جب تک واشنگٹن کی جانب سے ترسیل کی حتمی تاریخیں فراہم نہیں کی جاتیں، ادائیگیاں جاری نہیں کی جائیں گی۔

سوئس حکومت نے بیان میں کہا ہے کہ پیٹریاٹ میزائل سسٹم کی فراہمی کا شیڈول غیر یقینی کا شکار ہے۔ ادائیگیاں بھی واضح نہیں ہیں، جس کے باعث ادائیگی روکنے کا فیصلہ کیا گیا ہے۔ حکومت نے معاہدہ ختم کرنے کو بھی ایک ممکنہ آپشن قرار دیا ہے۔

وزیر دفاع مارٹن فسٹر نے کہا کہ حکومت دفاعی نظام کے حصول کی خواہاں ہے، تاہم تمام ممکنہ آپشنز پر غور کیا جا رہا ہے۔ انہوں نے کہا کہ امریکا کے ساتھ تمام ممکنہ راستوں پر بات چیت جاری ہے، جن میں معاہدہ ختم کرنے کا امکان بھی شامل ہے۔

وزیر دفاع نے مزید کہا کہ کسی بھی ممکنہ منسوخی کی شرائط ابھی واضح نہیں ہیں، اور اس حوالے سے مذاکرات جاری ہیں۔ دوسری جانب، ایف-35 اے لڑاکا طیاروں کی خریداری کی ادائیگی مارچ 2026 تک منتقل کردی گئی ہے، تاکہ پیٹریاٹ سسٹم سے متعلق فیصلے اس منصوبے کو متاثر نہ کریں۔

واضح رہے کہ سوئٹزرلینڈ کی وزارت دفاع کے مطابق پیٹریاٹ میزائل سسٹم کی خریداری کے حوالے سے آئندہ اقدامات سے متعلق جون کے اختتام تک وفاقی کونسل کو آگاہ کیا جائے گا۔