اسلام آباد: (رائیٹ ناوٴ نیوز) سینیٹ کی قائمہ کمیٹی برائے خزانہ نے ٹیلی کام کمپنیوں سے بینک پیغامات کے بھاری چارجز کی وضاحت طلب کر لی ہے۔ کمیٹی نے اس مسئلے پر تفصیلات فراہم کرنے کا کہا ہے تاکہ صارفین کو ممکنہ ریلیف دیا جا سکے۔

اجلاس میں چیئرمین سلیم مانڈوی والا کی صدارت میں ٹیلی کام کمپنیوں کے بینک ایس ایم ایس چارجز کا جائزہ لیا گیا۔ بینکنگ ایسوسی ایشن اور اسٹیٹ بینک کے حکام نے کمیٹی کو بریفنگ دی۔

صدر بینک آف پنجاب نے بتایا کہ بینک صارفین سے دو طرح کے چارجز وصول کیے جاتے ہیں۔ انہوں نے کہا کہ 2021 سے چارجز میں 88 فیصد اضافہ ہوا ہے جبکہ ٹیلی کام کمپنیاں بھاری چارجز وصول کر رہی ہیں۔

واضح رہے کہ اسٹیٹ بینک حکام نے کہا کہ لازمی پیغامات پر چارجز نہیں ہوتے اور بینکوں کو ایس ایم ایس چارجز واضح کرنے کی ہدایت دی گئی ہے۔ بینکوں نے 18 ارب 70 کروڑ روپے وصول کیے جبکہ ٹیلی کام کمپنیوں کو 25 ارب 60 کروڑ روپے ادا کیے گئے۔

یاد رہے کہ مختلف ٹیلی کام کمپنیوں نے اربوں روپے وصول کیے ہیں۔ کمیٹی نے چارجز کی وجوہات کا جائزہ لینے کے لیے مزید تفصیلات طلب کی ہیں۔