اسلام آباد: (رائیٹ ناوٴ نیوز) مشرق وسطیٰ میں جاری جنگ کی شدت کے اثرات پاکستان کی توانائی مارکیٹ پر پہنچ چکے ہیں۔ اس کے نتیجے میں ایل پی جی کی قیمتوں میں بڑے اضافے کا خدشہ پیدا ہوگیا ہے۔

ایل پی جی ڈسٹری بیوشن ایسوسی ایشن نے خبردار کیا ہے کہ فی کلو ایل پی جی کی قیمت میں 90 سے 100 روپے تک اضافہ متوقع ہے۔ اس کے بعد اس کی قیمت 500 روپے فی کلو تک پہنچ سکتی ہے۔

صارفین کو آگاہ کیا گیا ہے کہ گھریلو سلنڈر کی قیمت میں بھی ایک ہزار روپے تک اضافہ ہو سکتا ہے۔ جبکہ عالمی سطح پر قیمتوں میں اضافے کے باعث کمرشل سلنڈر 4 ہزار 500 روپے تک مہنگا ہو سکتا ہے۔

توانائی کے ماہر عرفان کھوکھر نے کہا ہے کہ ایل پی جی کی بڑھتی قیمتیں مہنگائی کے نئے طوفان کا باعث بن سکتی ہیں۔ اس سے غریب طبقہ گیس کی خریداری سے محروم ہو سکتا ہے۔

واضح رہے کہ عالمی مارکیٹ میں ایل پی جی کی قیمت میں 238 ڈالر کا اضافہ ہو چکا ہے۔ ایل پی جی ڈسٹری بیوشن ایسوسی ایشن نے حکومت سے مطالبہ کیا ہے کہ موثر حکمت عملی تیار کی جائے تاکہ صارفین کو بحران سے بچایا جا سکے۔