لاہور: (رائیٹ ناوٴ نیوز) لیڈی ولنگڈن اسپتال میں آپریشن تھیٹر کی ویڈیو وائرل ہونے کے بعد 5 ڈاکٹرز کی پوسٹ گریجویٹ ٹریننگ ختم کر دی گئی۔ اس ویڈیو نے عوام میں تشویش پیدا کر دی، جس پر پنجاب حکومت نے فوری ایکشن لیا۔

پنجاب کے محکمہ اسپیشلائزڈ ہیلتھ کیئر نے واقعے پر سخت کارروائی کرتے ہوئے 5 ڈاکٹرز کی ٹریننگ ختم کر دی۔ یہ فیصلہ پالیسی اینڈ پروسیجر مینوئل کی شق 13.2 کے تحت لیا گیا ہے، جو غفلت اور ضابطہ اخلاق کی خلاف ورزی پر مبنی ہے۔

متاثرہ ڈاکٹرز میں ڈاکٹر طیبہ فاطمہ، ڈاکٹر ماہم امین، ڈاکٹر زینب طاہر، ڈاکٹر عائشہ افضل اور ڈاکٹر آمنہ رشید شامل ہیں۔ معاملے کو پاکستان میڈیکل اینڈ ڈینٹل کونسل اور کالج آف فزیشنز اینڈ سرجنز کو بھی بھیج دیا گیا ہے۔

یہ واقعہ طبی شعبے کی اخلاقیات پر سوالات اٹھاتا ہے اور مریضوں کے وقار کی پامالی کا باعث بنا ہے۔ ویڈیو میں دو ٹیموں کے درمیان مبینہ سرجری مقابلہ دکھایا گیا ہے، جس میں مریضوں کا خیال نہیں رکھا گیا۔

واضح رہے کہ لیڈی ولنگڈن اسپتال میں یہ واقعہ سوشل میڈیا پر وائرل ہوا، جس میں ڈاکٹرز کے غیر ذمہ دارانہ رویے کی مذمت کی گئی۔ حکومت پنجاب نے ضابطہ اخلاق کی خلاف ورزی پر فوری نوٹس لیا اور متعلقہ ڈاکٹروں کو معطل کر دیا۔