لاہور: (رائیٹ ناوٴ نیوز) لالی وڈ کے معروف نغمہ نگار الطاف باجوہ کا انتقال ہوگیا، جس سے پاکستان کی شوبز اور موسیقی کی دنیا سوگوار ہوگئی۔ مرحوم کی نماز جنازہ علامہ اقبال ٹاؤن کی جامع مسجد میں ادا کی گئی، جس میں شوبز انڈسٹری کی متعدد معروف شخصیات، فنکاروں اور مداحوں نے شرکت کی اور انہیں خراج عقیدت پیش کیا۔

خاندانی ذرائع کے مطابق الطاف باجوہ کافی عرصے سے علیل تھے اور ان کی طبیعت مسلسل ناساز تھی۔ ان کے انتقال کی خبر سے شوبز حلقوں میں افسوس کی لہر دوڑ گئی اور فنکاروں نے سوشل میڈیا پر تعزیت کا اظہار کیا۔

الطاف باجوہ نے اپنے طویل فنی کیریئر میں پنجابی موسیقی کو لازوال گیتوں سے نوازا۔ ان کے گانوں کو نصیبو لال سمیت کئی معروف گلوکاروں نے اپنی آواز دی، جو عوام میں بے حد مقبول ہوئے۔

ان کی شاعری میں دیہی زندگی کی خوشبو اور محبت کے جذبات نمایاں تھے، جس نے انہیں منفرد مقام عطا کیا۔ الطاف باجوہ نے لالی وڈ موسیقی کو نئی جہتیں دیں اور اپنے فن سے عوام کے دلوں میں جگہ بنائی۔

یاد رہے کہ ان کے انتقال سے لالی وڈ ایک باصلاحیت نغمہ نگار سے محروم ہوگیا ہے۔ فنکار برادری اور مداحوں نے ان کے لیے دعائے مغفرت اور لواحقین کے لیے صبر کی دعا کی۔