کراچی: (رائیٹ ناوٴ نیوز) مختلف ادویات کی قیمتوں میں ہوشربا اضافہ کر دیا گیا ہے، جس سے ذیابیطس کے علاج میں استعمال ہونے والی انسولین کی قیمت دو گنا سے بھی زیادہ ہوگئی ہے۔

انسولین انجیکشن ڈیوائس کی قیمت 2200 سے بڑھ کر 4720 روپے ہو گئی ہے جبکہ بدہضمی اور تیزابیت کی دوا کے پیک کی قیمت 530 سے بڑھا کر 620 روپے کر دی گئی ہے۔ وٹامنز اور غذائی سپلیمنٹ کی گولیوں کے پیک کی قیمت 480 سے بڑھا کر 510 روپے مقرر کی گئی ہے جبکہ وٹامن بی کی کمی دور کرنے والی دوا کی قیمت 500 سے بڑھا کر 600 روپے ہو گئی ہے۔

تھائیرائڈ کے مرض کے علاج میں استعمال ہونے والی دوا کی قیمت 85 سے بڑھا کر 290 روپے مقرر کی گئی ہے اور ٹائیفائیڈ کے علاج میں استعمال ہونے والی دوا کی قیمت 805 سے بڑھا کر 930 روپے کر دی گئی ہے۔ دیگر متعدد جان بچانے والی ادویات کی قیمتیں بھی بڑھ گئی ہیں۔

حکام نے اس اضافے کی وجوہات کے بارے میں ابھی تک کوئی واضح بیان نہیں دیا ہے۔ عوام میں اس قیمت اضافے کے خلاف شدید غم و غصہ پایا جاتا ہے کیونکہ یہ عوام کے لیے مزید مشکلات کا باعث بن سکتا ہے۔

واضح رہے کہ ادویات کی قیمتوں میں اضافے کا یہ سلسلہ گزشتہ کچھ مہینوں سے جاری ہے اور اس کے نتیجے میں عوام کو صحت کی دیکھ بھال میں مشکلات کا سامنا کرنا پڑ رہا ہے۔