تہران: (رائیٹ ناوٴ نیوز) ایران کے نئے رہبر اعلیٰ مجتبیٰ خامنہ ای نے نوروز کے موقع پر اپنے پیغام میں کہا ہے کہ ایران کے دشمنوں کو شکست ہو چکی ہے۔ انہوں نے کہا کہ داخلی اختلافات کے باوجود ایرانی قوم امریکا اور اسرائیل کے خلاف متحد ہے۔

مجتبیٰ خامنہ ای نے کہا کہ قومی وحدت نے ایران کو موجودہ جنگ میں مضبوط کیا ہے اور مذہبی، فکری، ثقافتی و سیاسی اختلافات کے باوجود ایرانی عوام دشمن کے مقابلے میں ایک موقف پر کھڑے ہیں۔

انہوں نے واضح کیا کہ ترکیہ اور عمان کو نشانہ بنانے والے حملے ایران یا اس کے کسی اتحادی گروپ نے نہیں کیے۔ ان کے مطابق ایران پڑوسی ممالک کے ساتھ تعلقات مزید مضبوط بنانے پر یقین رکھتا ہے۔

مجتبیٰ خامنہ ای نے نئے ایرانی سال کو قومی وحدت، قومی سلامتی اور مضبوط معیشت کا سال قرار دیا ہے۔ یہ بیان ایسے وقت میں آیا ہے جب ایران میں اعلیٰ سطح کی قیادت کو حالیہ حملوں میں بھاری نقصان پہنچا ہے۔

رپورٹس کے مطابق مجتبیٰ خامنہ ای اپنے والد علی خامنہ ای کی جگہ رہبر اعلیٰ نامزد ہونے کے بعد اب تک عوامی منظرنامے پر نہیں آئے۔ علی خامنہ ای 28 فروری 2026 کو جنگ کے پہلے دن اسرائیلی حملے میں مارے گئے تھے۔