تہران: (رائیٹ ناوٴ نیوز) ایرانی پاسداران انقلاب نے اسرائیلی ایف 16 طیارے کو گرانے کا دعویٰ کیا ہے، ان کا کہنا ہے کہ یہ جنگ کے دوران تیسرا طیارہ ہے جسے نشانہ بنایا گیا۔ اس کے ساتھ ہی ایرانی نیوی نے متحدہ عرب امارات اور کویت میں امریکی بیسز پر حملے کیے ہیں۔ پاسداران انقلاب کے مطابق المنہاد ایئربیس اور علی السالم ایئربیس کو نشانہ بنایا گیا، جو ایرانی جزیروں پر حملوں کے لیے استعمال ہو رہے تھے۔

دوسری جانب، اسرائیلی فوج نے تہران میں میزائل فیکٹری کو نشانہ بنانے کا دعویٰ کیا ہے، جس سے ایران کی میزائل صلاحیتوں میں کمی آئی ہے۔ ایرانی عہدیداروں کا کہنا ہے کہ آبنائے ہرمز کے بعد دیگر سمندری گزرگاہوں پر بھی ان کی نظر ہے، اور باب المندب کو عدم تحفظ کا شکار کرنے کے منصوبے پر عمل جاری ہے۔

ایرانی میڈیا کے مطابق حساس معلومات شیئر کرنے پر 25 افراد کو گرفتار کیا گیا ہے، جنہوں نے حساس مقامات کی تصاویر مخالف میڈیا اداروں کو دیں۔ ایرانی حکام کے مطابق جنگ کے آغاز سے اب تک 20,984 ایرانی زخمی ہوئے ہیں، 7 اسپتال خالی کرائے گئے اور 36 ایمبولینسز تباہ ہوئیں۔

مصری صدر عبد الفتح السیسی نے سعودی عرب کے دورے کے دوران سعودی ولی عہد شہزادہ محمد بن سلمان سے ملاقات کی۔ دونوں رہنماؤں نے ایرانی کشیدگی کی مذمت کی اور ایرانی حملوں کو خطے کی سلامتی کے لیے خطرہ قرار دیا۔

حزب اللہ نے شمالی اسرائیل پر میزائل داغے ہیں، جبکہ جنوبی لبنان میں اسرائیلی طیارے بمباری کر رہے ہیں۔ بحرین نے رہائشی عمارت پر امریکی پیٹریاٹ میزائل لگنے کی تصدیق کی ہے، جسے ڈرون انٹرسیپٹ کرنے کے لیے فائر کیا گیا تھا۔