نیویارک: (رائیٹ ناوٴ نیوز) عالمی جنگوں کی وجہ سے دفاعی اخراجات میں اضافے کے باعث دفاعی کمپنیوں کے بڑے شیئر ہولڈرز نے تین ماہ کے اندر 28 ارب ڈالر کما لیے ہیں۔

بلوم برگ کے مطابق، 14 افراد اور خاندانوں کی دولت میں یہ اضافہ دفاعی کمپنیوں کے شیئرز میں تیزی کی وجہ سے ہوا ہے، جن میں میزائل، ڈرون اور الیکٹرانک جنگی نظام تیار کرنے والی کمپنیاں شامل ہیں۔

حکومتیں اپنی افواج کو جدید بنانے کی دوڑ میں شامل ہوچکی ہیں، جس کی وجہ سے دفاعی اسٹاک مارکیٹ میں تیزی دیکھی گئی ہے۔ 2026 کے دوران عالمی دفاعی کمپنیوں کے انڈیکس میں 18 فیصد اضافہ ہوا ہے۔

امریکا نے ایران کے خلاف جنگ میں ابتدائی چھ دنوں میں 11.3 ارب ڈالر خرچ کیے، جبکہ پنٹاگون نے مزید 200 ارب ڈالر کی فنڈنگ کی درخواست دی ہے۔ اسرائیل کا دفاعی بجٹ بھی 46 ارب ڈالر تک پہنچ گیا ہے، جو 2023 کے مقابلے میں 120 فیصد زیادہ ہے۔

یورپی ممالک نے روس کے 2022 میں یوکرین پر حملے کے بعد دفاعی بجٹ میں 60 فیصد سے زائد اضافہ کیا ہے۔ امریکی صدر ڈونلڈ ٹرمپ کے خاندان کے افراد بھی اس شعبے میں سرمایہ کاری سے فائدہ اٹھا رہے ہیں۔