اسلام آباد: (رائیٹ ناوٴ نیوز) حکومت کی جانب سے پیٹرولیم مصنوعات کی قیمتوں کا اعلان آج متوقع ہے۔ وفاقی حکومت کو پیٹرول کی فی لیٹر قیمت میں 29 روپے اور ڈیزل کی فی لیٹر قیمت میں 49 روپے اضافے کی سمری موصول ہوئی ہے۔ پیٹرولیم مصنوعات کی قیمتوں میں ردوبدل کا حتمی فیصلہ وزیراعظم شہباز شریف کریں گے۔

وفاقی حکومت نے 14 مارچ کو ایک ہفتے کے لیے 23 ارب روپے کا بوجھ اٹھایا تھا اور 14 سے 20 مارچ تک پیٹرول و ڈیزل کی قیمتیں برقرار رکھی تھیں۔ حکومت نے پرائس ڈیفرنشیل کلیمز کی مد میں یہ بوجھ اٹھایا تھا، جس کے تحت پیٹرول کی قیمت میں 49 روپے 63 پیسے اور ڈیزل کی قیمت میں 75 روپے 5 پیسے فی لیٹر کا اضافہ روکا گیا تھا۔

ذرائع کے مطابق آئندہ ہفتے کے لیے بھی پیٹرول اور ڈیزل کی قیمتیں برقرار رہ سکتی ہیں، کیونکہ وفاقی حکومت پرائس ڈیفرنشیل کلیمز اٹھا سکتی ہے۔ پیٹرول کی موجودہ فی لیٹر قیمت میں 121 روپے 77 پیسے صرف ٹیکس شامل ہے جبکہ ڈیزل کی فی لیٹر قیمت میں 73 روپے 42 پیسے ٹیکس شامل ہے۔