ٹوکیو: (رائیٹ ناوٴ نیوز) جاپان کے ایڈوانسڈ ٹیلی کمیونیکیشنز ریسرچ انسٹیٹیوٹ انٹرنیشنل کی ایک تحقیق میں انکشاف ہوا ہے کہ انسان کی چہل قدمی کے انداز سے اس کی جذباتی کیفیت کا اندازہ لگایا جا سکتا ہے۔ محققین نے رضاکاروں کو ویڈیو کلپس دکھا کر لوگوں کے جذبات کا اندازہ لگانے کے لیے کہا۔ تحقیق کے مطابق، ہاتھوں کی زیادہ جھلک غصے کا، جبکہ معمولی حرکت خوف یا اداسی کا اشارہ دیتی ہے۔

تحقیق میں اداکاروں کو مختلف جذبات، جیسے غصہ، خوشی، خوف یا اداسی کو یاد کرتے ہوئے چہل قدمی کرنے کو کہا گیا اور ان کے چال کے انداز کو ٹریکرز کی مدد سے ریکارڈ کیا گیا۔ رضاکاروں نے ان ویڈیوز کو دیکھ کر رائے دی، جس سے یہ ثابت ہوا کہ چہل قدمی کے انداز سے جذبات کی شناخت کی جا سکتی ہے۔

نتائج جرنل رائل سوسائٹی اوپن سائنس میں شائع ہوئے، جس سے ظاہر ہوتا ہے کہ انسان کے چال کے انداز کو دیکھ کر اس کی جذباتی کیفیت کا مؤثر طور پر اندازہ لگایا جا سکتا ہے، چاہے چہرہ نظر نہ آئے۔