تہران: (رائیٹ ناوٴ نیوز) ایران نے حالیہ امریکی حملے کے ردعمل میں متحدہ عرب امارات میں موجود امریکی پناہ گاہوں کو نشانہ بنانے کی دھمکی دی ہے۔ ایرانی فوجی ترجمان نے اماراتی شہریوں کو ممکنہ خطرے سے خبردار کرتے ہوئے امریکی اہداف سے دور رہنے کی ہدایت کی ہے۔ ایران کا دعویٰ ہے کہ امارات سے ایران کے خارگ جزیرے پر حملے کیے گئے تھے، جنہیں اب جوابی کارروائی کا سامنا ہوگا۔

گزشتہ روز امریکی حملے میں خارگ جزیرے پر 90 فوجی تنصیبات کو نشانہ بنایا گیا، تاہم ایران نے تباہی کی شدت کو مبالغہ قرار دیا اور مزید خطرناک ہتھیاروں کے استعمال کی دھمکی دی ہے۔

دوسری جانب امارات نے ایرانی الزامات کو مسترد کرتے ہوئے کہا ہے کہ حملے میں اماراتی سرزمین استعمال نہیں ہوئی۔ اماراتی سفارتی مشیر نے ایران کی پالیسی کو بے بنیاد قرار دیا۔

فجیرہ پورٹ پر ایرانی ڈرون حملے کے بعد کچھ آئل لوڈنگ آپریشنز معطل ہو گئے اور آگ بھڑک اٹھی۔ اماراتی حکام نے 9 بیلسٹک میزائل اور 33 ڈرون تباہ کرنے کا دعویٰ کیا ہے۔ خارگ جزیرہ ایران کے ساحل سے 25 کلومیٹر دور واقع ہے، جہاں سے ایران کا 90 فیصد تیل عالمی منڈی میں جاتا ہے۔