تہران: (رائیٹ ناوٴ نیوز) ایران کی پاسدارانِ انقلاب نے کہا ہے کہ ایران کے جزیرہ خرج پر امریکی حملوں کے بعد متحدہ عرب امارات میں موجود امریکی فوجی مقامات ‘جائز اہداف’ بن سکتے ہیں۔ آئی آر جی سی نے بیان میں کہا کہ ایران کو اپنی قومی خودمختاری اور سرزمین کے دفاع کا حق حاصل ہے۔

آئی آر جی سی نے خبردار کیا کہ وہ ان مقامات کو نشانہ بنا سکتی ہے جہاں سے امریکی حملوں کی کارروائیاں کی جا رہی ہیں، جن میں بندرگاہیں، شپنگ ڈوکس اور امریکی فوجی مقامات شامل ہیں۔ ایرانی پاسدارانِ انقلاب نے اماراتی شہریوں کو خبردار کیا کہ وہ ان علاقوں سے دور رہیں تاکہ کسی ممکنہ حملے میں متاثر نہ ہوں۔

یہ بیان ایسے وقت سامنے آیا ہے جب امریکہ نے ایران کے جزیرہ خرج پر فوجی اہداف کو نشانہ بنانے کا دعویٰ کیا ہے۔ اس واقعے کے بعد خلیج فارس میں کشیدگی مزید بڑھنے کا خدشہ ظاہر کیا جا رہا ہے۔ امریکی صدر ڈونلڈ ٹرمپ نے کہا تھا کہ امریکی افواج نے جزیرہ خرج پر تمام فوجی اہداف کو نشانہ بنایا، تاہم تیل کے بنیادی ڈھانچے کو نہیں چھیڑا۔