اسلام آباد: (رائیٹ ناوٴ نیوز) وزیراعظم شہباز شریف نے عالمی منڈی میں تیل کی قیمتوں کے اضافے کے باوجود پیٹرولیم مصنوعات کی قیمتیں نہ بڑھانے کا اعلان کیا ہے۔ انہوں نے کہا کہ عام آدمی پر بوجھ کم کرنے کے لیے پیٹرولیم مصنوعات کی قیمتوں میں اضافہ نہیں کیا جا رہا۔

وزیراعظم نے کہا کہ وعدے کے مطابق مشکل حالات میں عوام کو ریلیف فراہم کرنے کی کوشش جاری رہے گی۔ انہوں نے مزید کہا کہ خطے میں کشیدگی کی وجہ سے عالمی معیشت دباؤ میں ہے اور پاکستان کی معیشت پر بھی گہرے اثرات کا خدشہ ہے۔

وزیراعظم نے کہا کہ بروقت پالیسی سازی اور مالی نظم و ضبط سے صورتحال سے نمٹنے کی کوشش جاری ہے۔ انہوں نے کہا کہ یہ خوش آئند ہے کہ وفاقی حکومت کے بچت اقدامات کے ساتھ صوبائی حکومتیں بھی تعاون کر رہی ہیں۔

وزیراعظم نے کہا کہ وفاقی و صوبائی حکومتیں مقرر کردہ قیمت سے زائد وصولی کی روک تھام یقینی بنا رہی ہیں اور دعاگو ہیں کہ عالمی سطح پر حالات بہتر ہوں اور پیٹرولیم مصنوعات کی قیمتوں میں استحکام آئے۔