نیویارک: (رائیٹ ناوٴ نیوز) امریکی حکام نے دعویٰ کیا ہے کہ ایران نے آبنائے ہرمز میں بارودی سرنگیں بچھانا شروع کر دی ہیں جس سے عالمی جہاز رانی میں خلل پڑنے کا خدشہ ہے۔ انٹیلی جنس رپورٹوں کے مطابق ایران نے اب چھوٹی کشتیوں کا استعمال شروع کر دیا ہے۔

ایک امریکی اہلکار نے بتایا کہ ایران کی اسلامی انقلابی گارڈ کور سینکڑوں کشتیوں کو تعینات کر سکتی ہے جو ماضی میں بڑے بحری جہازوں کو ہراساں کرنے کے لیے استعمال کی گئی ہیں۔ حالیہ کوششیں سست ہیں لیکن ایران کا مقصد بارودی سرنگوں کی تیزی سے تنصیب ہے تاکہ آبنائے کے ذریعے جہاز رانی کو روکا جا سکے۔

یہ پیشرفت امریکا اور اسرائیل کے مشترکہ حملوں کے بعد سامنے آئی ہے جس کے نتیجے میں آبنائے ہرمز کو بند کر دیا گیا تھا، اس سے جہاز رانی متاثر ہوئی اور تیل کی قیمتوں میں اضافہ ہوا۔ آبنائے ہرمز دنیا کے تقریباً 20 فیصد خام تیل اور قدرتی گیس کی آمد و رفت کا اہم راستہ ہے۔