عالمی منڈی میں برینٹ آئل کی قیمت 100 ڈالر فی بیرل سے زائد ہونے کے باعث پیٹرول اور ڈیزل کی قیمتوں میں اضافہ متوقع ہے۔ حکومت جمعہ کو باضابطہ اعلان کرے گی۔
اسلام آباد: (رائیٹ ناوٴ نیوز) وفاقی حکومت کی طرف سے پیٹرولیم مصنوعات کی قیمتوں میں ردوبدل کا اعلان جمعہ کو کیا جائے گا۔ عالمی مارکیٹ میں برینٹ آئل کی قیمت 100 ڈالر فی بیرل سے زائد ہو گئی ہے، جس کے باعث پیٹرول اور ڈیزل کی قیمتوں میں آج مزید اضافہ متوقع ہے۔
پاکستان کے پاس مارچ کے لیے تیل کا وافر ذخیرہ موجود ہے تاہم عالمی قیمتوں میں اضافے کے باعث مقامی مارکیٹ میں بھی قیمتوں میں اضافہ ہو سکتا ہے۔ حکومت نے کفایت شعاری اقدامات کے تحت آج اسلام آباد میں سرکاری چھٹی کا اعلان کیا ہے اور جیٹ فیول پیٹرو کیمیکل مصنوعات کی برآمد پر پابندی عائد کر دی ہے۔
وزیر پیٹرولیم علی پرویز ملک نے کہا ہے کہ جمعہ کو پیٹرولیم مصنوعات کی قیمتوں میں ردوبدل کا باضابطہ اعلان کیا جائے گا اور نئی قیمتیں اوسط نرخوں کو مدنظر رکھ کر مقرر کی جائیں گی۔ خطے کی کشیدہ صورتحال اور عالمی منڈی میں خام تیل کی بڑھتی قیمتوں کے باعث حکومت گزشتہ ہفتے پیٹرول اور ڈیزل کی قیمت میں 55 روپے فی لیٹر اضافہ کر چکی ہے۔
