اسلام آباد: (رائیٹ ناوٴ نیوز) سینیٹ کی قائمہ کمیٹی برائے خزانہ کا اجلاس چیئرمین سلیم مانڈوی والا کی صدارت میں ہوا جس میں پیٹرولیم مصنوعات کی قیمتوں اور توانائی کی صورتحال پر بریفنگ دی گئی۔ وفاقی وزیر خزانہ محمد اورنگزیب نے بتایا کہ وزیراعظم شہباز شریف نے پیٹرولیم قیمتوں کی نگرانی کے لیے خصوصی کمیٹی قائم کی ہے۔

وزیر خزانہ نے کہا کہ عالمی منڈی میں قیمتوں کی تیزی سے تبدیلی کے سبب پیٹرولیم مصنوعات کی خریداری کے فیصلے فوری طور پر کرنا پڑتے ہیں۔ حالیہ حملوں کے باعث قطر سے مائع قدرتی گیس (ایل این جی) کی درآمد متاثر ہوئی جس سے قیمتوں میں اضافہ ہوا ہے۔

محمد اورنگزیب نے بتایا کہ ایل این جی کا کارگو جو پہلے 25 ملین ڈالر میں دستیاب ہوتا تھا، اب 100 ملین ڈالر تک پہنچ گیا ہے، جس سے توانائی کی لاگت میں اضافہ ہوا ہے۔ ان کا کہنا تھا کہ آئندہ دنوں میں پیٹرولیم مصنوعات کی قیمتوں میں مزید اضافے کا امکان ہے۔

اجلاس میں پیٹرولیم ڈویژن کے حکام نے بتایا کہ پاکستان میں پانچ ریفائنری پلانٹس کام کر رہے ہیں جو قدیم ہیں۔ سعودی عرب پاکستان کو رعایتی قیمت پر کروڈ آئل فراہم کر رہا ہے۔ سینیٹر فاروق ایچ نائیک نے قیمتوں میں اضافے پر سوال اٹھاتے ہوئے کہا کہ غریب طبقہ 55 روپے کے اضافے کا بوجھ برداشت نہیں کر سکتا۔