تہران: (رائیٹ ناوٴ نیوز) ایرانی پاسداران انقلاب نے اعلان کیا ہے کہ جو ممالک امریکی اور اسرائیلی سفیروں کو نکالیں گے، انہیں آبنائے ہرمز استعمال کرنے کی اجازت دی جائے گی۔ یہ اعلان پاسداران انقلاب کی جانب سے جاری کردہ ایک بیان میں کیا گیا ہے جس میں کہا گیا کہ ان ممالک کو کل سے آبنائے ہرمز سے گزرنے کی مکمل آزادی ہوگی۔

امریکی صدر نے ری پبلکن کانفرنس میں خطاب کرتے ہوئے کہا کہ وقت آنے پر امریکی نیوی آبنائے ہرمز میں جہازوں کی حفاظت کرے گی۔ قبل ازیں، امریکی صدر نے یہ بھی کہا تھا کہ ضرورت پڑنے پر امریکی نیوی کمرشل جہازوں کے ساتھ آبنائے ہرمز میں موجود ہوگی۔

ایران کی پاسداران انقلاب نے امریکی صدر ڈونلڈ ٹرمپ کو چیلنج کرتے ہوئے کہا تھا کہ اگر انہیں ہمت ہے تو آبنائے ہرمز میں تیل بردار جہازوں کی حفاظت کے لیے امریکی بحری جہاز تعینات کرکے دکھائیں۔ امریکی صدر نے کہا کہ ضرورت پڑنے پر امریکی بحریہ تیل بردار جہازوں کو سکیورٹی فراہم کرے گی۔