اسلام آباد: (رائیٹ ناوٴ نیوز) آل پاکستان پیٹرول پمپ ایسوسی ایشن نے پیٹرولیم مصنوعات کی ممکنہ قلت پر وزیراعظم کو خط لکھا ہے۔ ایسوسی ایشن نے خط میں مطالبہ کیا ہے کہ حکومت فوری اقدامات کرے تاکہ ملک میں ایندھن کی قلت کا سامنا نہ ہو۔

خط میں کہا گیا ہے کہ خلیجی ممالک کی غیر یقینی صورتحال کی وجہ سے آئل مارکیٹنگ کمپنیوں نے پیٹرولیم مصنوعات کے کوٹے پر حد مقرر کر دی ہے۔ اس کے نتیجے میں متعدد کمپنیوں نے فراہمی میں کمی کر دی ہے جبکہ کچھ مقامات پر سپلائی مکمل طور پر بند ہو چکی ہے، جس سے پیٹرول پمپس کو مشکلات اور صارفین میں بے چینی پیدا ہو رہی ہے۔

ایسوسی ایشن نے مزید کہا کہ کسی بھی ہنگامی ضرورت کے پیش نظر سعودی عرب تعاون جاری رکھے گا۔ خط میں یہ بھی کہا گیا ہے کہ عالمی صورتحال کا مکمل ادراک ہے اور پیٹرول پمپ مالکان کو اعتماد میں لیے بغیر کوئی فیصلہ مسائل میں اضافہ کر سکتا ہے۔ ایسوسی ایشن نے مطالبہ کیا کہ پالیسی فیصلوں میں انہیں شامل کیا جائے۔