اسلام آباد: (رائیٹ ناوٴ نیوز) پاکستان کی کرکٹ ٹیم کے دورہ بنگلا دیش کے دوران ون ڈے سیریز کے لیے اسکواڈ میں اہم تبدیلیوں کا امکان ہے، جس میں سینیئر کھلاڑیوں کو باہر رکھا جا سکتا ہے۔

یہ فیصلہ آئندہ بڑے ٹورنامنٹ، آئی سی سی مینز کرکٹ ورلڈ کپ کے پیش نظر کیا جا رہا ہے تاکہ مستقبل میں ٹی 20 ورلڈ کپ 2028 کی بہتر تیاری ہو سکے۔ ٹیم مینجمنٹ اور سلیکٹرز نئے چہروں کو موقع دینے کے حق میں ہیں تاکہ مستقبل کے لیے مضبوط پلان بنایا جا سکے۔

بنگلا دیش کے خلاف تین ون ڈے میچز 11، 13 اور 15 مارچ 2026 کو شیر بنگلا نیشنل اسٹیڈیم ڈھاکا میں ہوں گے، جبکہ پاکستان ٹیم 9 مارچ کو بنگلا دیش پہنچے گی۔ تاہم، خطے کی کشیدہ صورتحال کے باعث دورے کے متاثر ہونے کا امکان ہے۔

میڈیا رپورٹس کے مطابق بابر اعظم، صائم ایوب، اور محمد نواز کو اسکواڈ سے باہر رکھا جا سکتا ہے کیونکہ سلیکشن کمیٹی بڑے پیمانے پر تبدیلیاں کرنے پر غور کر رہی ہے۔

اگرچہ ٹی ٹوئنٹی انٹرنیشنل ٹیم میں فوری تبدیلیاں نہیں ہوں گی، ون ڈے اسکواڈ میں تجربہ کار کھلاڑیوں کی جگہ نوجوان کھلاڑیوں کو موقع دینے پر غور کیا جا رہا ہے۔