تہران: (رائیٹ ناوٴ نیوز) ایران کے نیم سرکاری خبر رساں اداروں مہرنیوز اور تسنیم نیوز کے مطابق ایرانی سپریم لیڈر آیت اللہ علی خامنہ ای زندہ اور محفوظ ہیں۔ ان نیوز رپورٹس میں کہا گیا کہ وہ میدان جنگ کی قیادت مضبوطی سے سنبھالے ہوئے ہیں۔

یہ دعویٰ ان اطلاعات کی تردید کرتا ہے جن میں رائٹرز اور بعض اسرائیلی ذرائع نے خامنہ ای کی ہلاکت کی خبر دی تھی۔ تہران کی جانب سے اب تک اس بارے میں کوئی رسمی تصدیق سامنے نہیں آئی ہے۔

ایرانی وزیر خارجہ عباس عراقچی نے امریکی نشریاتی ادارے سے گفتگو میں کہا کہ سپریم لیڈر اور دیگر اعلیٰ حکام خیریت سے ہیں۔

سپریم لیڈر کے دفتر کے شعبہ تعلقات عامہ کے سربراہ نے ان خبروں کو نفسیاتی جنگ قرار دیا۔ بیان میں کہا گیا کہ دشمن اس نوعیت کی اطلاعات کے ذریعے نفسیاتی دباؤ پیدا کرنا چاہتے ہیں۔

حالیہ فضائی حملوں کے بعد خطے میں کشیدگی میں اضافہ ہوا ہے اور سپریم لیڈر سے متعلق متضاد اطلاعات نے صورتحال کو مزید حساس بنا دیا ہے۔