ابوظہبی: (رائیٹ ناوٴ نیوز) متحدہ عرب امارات کی وزارت دفاع نے تصدیق کی ہے کہ ایرانی بیلسٹک میزائلوں نے ملک کو نشانہ بنایا، تاہم فضائی دفاعی نظام نے متعدد میزائلوں کو فضا میں ہی تباہ کر دیا۔ حکام کے مطابق، میزائلوں کے ٹکڑے ابوظہبی کے ایک رہائشی علاقے میں گرے، جس سے کچھ مادی نقصان ہوا اور ایک ایشیائی شہری ہلاک ہو گیا۔

وزارت دفاع نے حملے کی مذمت کرتے ہوئے کہا کہ شہری تنصیبات کو نشانہ بنانا ناقابل قبول ہے اور یہ خطے کے امن و سلامتی کے لیے خطرہ ہے۔ انہوں نے اسے قومی خودمختاری اور بین الاقوامی قانون کی خلاف ورزی قرار دیا۔

وزارت دفاع نے مزید کہا کہ ریاست کو اپنی سرزمین کے تحفظ کے لیے تمام ضروری اقدامات اٹھانے کا حق حاصل ہے اور وہ کسی بھی ممکنہ خطرے سے نمٹنے کے لیے مکمل طور پر تیار ہے۔