اسلام آباد: (رائیٹ ناوٴ نیوز) آئی ایم ایف نے متحدہ عرب امارات کے 2 ارب ڈالر کے قرض کی رول اوور میں ناکامی پر تشویش کا اظہار کیا ہے۔ اسٹیٹ بینک نے وفد کو یقین دلایا ہے کہ قلیل مدتی انتظامات مکمل ہیں اور طویل مدتی رول اوور پر بات چیت جاری ہے۔

وزیر خزانہ محمد اورنگزیب نے کہا کہ رول اوور میں کوئی مسئلہ نہیں ہے، لیکن میڈیا اسے مسئلہ بنا رہا ہے۔ آئی ایم ایف ممکنہ طور پر یو اے ای کے سفیر سے بھی ملاقات کر کے نئی یقین دہانی حاصل کرنا چاہے گا۔

نائب وزیراعظم اسحاق ڈار نے بتایا کہ یو اے ای نے ڈیپازٹس واپس نہیں لیے اور طویل مدت کے لیے بات چیت جاری ہے۔ تاہم، حکومت کو ابھی تک تحریری یقین دہانی موصول نہیں ہوئی اور نئی شرائط پر بات ہو رہی ہے۔

آئی ایم ایف مشن اور اسٹیٹ بینک کے درمیان مذاکرات میں زرمبادلہ کے ذخائر، مانیٹری پالیسی، اور بینکنگ ریگولیشنز پر تبادلہ خیال کیا گیا۔

اسٹیٹ بینک نے جنوری میں کرنٹ اکاؤنٹ کو 121 ملین ڈالر سرپلس بتایا، لیکن رواں مالی سال کے پہلے 7 ماہ میں 1.74 ارب ڈالر کا خسارہ ریکارڈ کیا گیا ہے۔