اسلام آباد: (رائیٹ ناوٴ نیوز) وزیراعظم شہباز شریف نے ڈرگ ریگولیٹری اتھارٹی آف پاکستان (ڈریپ) کے سی ای او ڈاکٹر عبید اللہ ملک کو ’ریفارم چیمپئن‘ ایوارڈ سے نوازا ہے۔ یہ ایوارڈ ڈریپ کی جانب سے نظام کو جدید بنانے، شفافیت لانے، اور عوام کی صحت کے تحفظ کے لیے کی جانے والی کوششوں کا اعتراف ہے۔

ڈاکٹر عبید اللہ نے ایوارڈ وصول کرتے وقت کہا کہ یہ کامیابی ڈریپ کی پوری ٹیم کی محنت کا نتیجہ ہے۔ انہوں نے کہا کہ ہمارا مقصد محفوظ اور معیاری ادویات کی فراہمی کو یقینی بنانا ہے۔

پاکستان فارماسیوٹیکل مینوفیکچررز ایسوسی ایشن (پی پی ایم اے) نے بھی اس موقع پر ڈاکٹر عبید اللہ کو مبارکباد پیش کی اور کہا کہ ڈریپ کی اصلاحات ادویات سازی کی صنعت کو مضبوط بنا رہی ہیں۔

فروری 2024 میں ڈریپ نے غیر ضروری ادویات کی قیمتوں کو کنٹرول سے آزاد کر دیا تھا، جس سے کمپنیوں کو لاگت کے حساب سے قیمتیں مقرر کرنے کا موقع ملا۔ اس کے باوجود، زندگی بچانے والی ادویات کی قیمتوں پر کنٹرول برقرار رکھا گیا۔

ان پالیسیوں کے نتیجے میں 2025 کے اختتام تک ادویات کی برآمدات میں 34 فیصد اضافہ ہوا، جو کہ 457 ملین ڈالر تک پہنچ گئی، اور یہ شعبہ ملک کے تیزی سے ترقی کرنے والے برآمدی شعبوں میں شامل ہو گیا۔