واشنگٹن: (رائیٹ ناوٴ نیوز) امریکی سینیٹر لنزے گراہم نے غزہ میں بچوں اور عورتوں سمیت شہریوں کی ہلاکتوں کو جائز قرار دیتے ہوئے کہا کہ اسرائیل نے یہ اقدامات اپنے دفاع میں کیے ہیں۔

لنزے گراہم نے اسکائی نیوز عربیہ کو انٹرویو دیتے ہوئے کہا کہ یہ جنگ ہے اور جنگ میں سب کچھ جائز ہوتا ہے۔ انہوں نے دوسری عالمی جنگ کی مثال دی جہاں جرمنوں کے خلاف بمباری کی گئی اور شہریوں کو نقصان پہنچایا گیا تھا۔

امریکی سینیٹر کے اس بیان پر عالمی سطح پر شدید تنقید ہو رہی ہے۔ انسانی حقوق کی تنظیموں اور متعدد ممالک نے ان کے بیان کو غیر انسانی اور جنگی جرائم کے مترادف قرار دیا ہے۔

غزہ میں اسرائیل اور حماس کے درمیان جاری کشیدگی میں شہریوں کو شدید نقصان پہنچا ہے اور امریکی سینیٹر کے بیانات نے تنازعے میں نئی عالمی بحث کو جنم دیا ہے۔

اسرائیل کی جانب سے غزہ میں جنگ بندی کے باوجود حملے جاری ہیں اور غزہ کے سرکاری میڈیا کے مطابق 10 اکتوبر 2025 سے 10 فروری 2026 تک 1,620 جنگ بندی خلاف ورزیاں ریکارڈ کی گئی ہیں۔