مقبوضہ مشرقی یروشلم میں ہزاروں مسلمان پہلی تراویح کے لیے مسجد اقصیٰ پہنچ گئے، اسرائیلی پابندیاں بھی ایمان کو نہ روک سکیں۔
غزہ: (رائیٹ ناوٴ نیوز) مقبوضہ مشرقی یروشلم میں اسرائیلی پابندیوں کے باوجود دسیوں ہزار مسلمان پہلی تراویح کے لیے مسجد اقصیٰ پہنچ گئے۔
چاند نظر آتے ہی رمضان المبارک کی آمد پر مسلمان قبلہ اول کی جانب روانہ ہو گئے۔
گلیوں اور چوکیوں سے گزرتے ہوئے نمازی اللہ کے حضور جھکنے کے جذبے سے سرشار تھے۔ قبلی مسجد کے اندر اور ڈوم آف راک کے اطراف صفیں بندھ گئیں۔
شیخ یوسف ابو سنینہ نے عشاء اور تراویح کی امامت کرائی، ہر سجدہ صبر اور امید کی داستان سنا رہا تھا۔
غزہ کے زخم ابھی تازہ ہیں جبکہ مغربی کنارے کی کارروائیوں نے دلوں میں اداسی پیدا کر رکھی ہے۔ یروشلم گورنریٹ نے خبردار کیا تھا کہ اسرائیلی حکام رکاوٹیں ڈال رہے ہیں، مگر ایمان کے سامنے یہ پابندیاں ناکام ہو گئیں۔
بزرگوں کی دعائیں، بچوں کی معصومیت اور نوجوانوں کا عزم یہ پیغام دے رہا ہے کہ مسجد اقصیٰ صرف ایک عمارت نہیں، بلکہ ایک زندہ عقیدہ ہے۔
