یروشلم: (رائیٹ ناوٴ نیوز) اقوامِ متحدہ کے سیکریٹری جنرل انتونیو گوتریس نے اسرائیل سے مطالبہ کیا ہے کہ وہ مغربی کنارے میں زمین کو ریاستی ملکیت قرار دینے کا نیا اقدام واپس لے، جسے غیر قانونی اور خطے کے لیے عدم استحکام کا باعث قرار دیا گیا ہے۔

اسرائیلی حکومت نے اتوار کو ایک پالیسی کی منظوری دی، جس کے تحت مقبوضہ مغربی کنارے کے بعض علاقوں کو ریاستی ملکیت کے طور پر رجسٹر کیا جا سکے گا۔ اسرائیلی وزارتِ خارجہ نے اس اقدام کا مقصد زمین کے حقوق سے متعلق قانونی تنازعات کو شفاف انداز میں حل کرنا قرار دیا ہے، تاہم عالمی سطح پر اس فیصلے کی مذمت کی جا رہی ہے۔

پاکستان نے بھی اس اقدام کی مذمت کرتے ہوئے کہا ہے کہ یہ بین الاقوامی قانون اور اقوامِ متحدہ کی قراردادوں کی کھلی خلاف ورزی ہے۔ دفترِ خارجہ کے ترجمان کے مطابق عالمی برادری کو چاہیے کہ وہ اس اشتعال انگیز فیصلے کو مسترد کرے اور اسرائیل کو قانون کا پابند بنائے۔

یورپی یونین نے بھی اسرائیل سے فیصلہ واپس لینے کا مطالبہ کیا ہے، جبکہ سعودی عرب، مصر، قطر اور اردن سمیت کئی عرب ممالک نے اس فیصلے کو امن کوششوں کے لیے خطرہ قرار دیا ہے۔

فلسطینی اتھارٹی نے عالمی مداخلت کا مطالبہ کرتے ہوئے کہا ہے کہ یہ اقدام فلسطینی ریاست کے قیام کی بنیادوں کو کمزور کر رہا ہے۔ انسانی حقوق کے لیے اقوامِ متحدہ کے ہائی کمشنر وولکر ٹورک نے بھی خبردار کیا کہ مقبوضہ علاقوں میں آبادی کا تناسب مستقل طور پر تبدیل کرنے کی کوششیں کی جا رہی ہیں۔