اسلام آباد: (رائیٹ ناوٴ نیوز) وزیراعظم محمد شہباز شریف نے نیپرا کی جانب سے سولر کے نئے ریگولیشنز کے اجراء کا فوری نوٹس لیا ہے۔ انہوں نے پاور ڈویژن کو ہدایت کی ہے کہ وہ سولر کے موجودہ صارفین کے کنٹریکٹ کے تحفظ کے لیے نظر ثانی کی اپیل دائر کرے۔

وزیراعظم نے زور دیا کہ سولر سے مستفید ہونے والے 4 لاکھ 66 ہزار صارفین کا بوجھ نیشنل گرڈ سے بجلی استعمال کرنے والے 3 کروڑ 76 لاکھ صارفین پر نہ ڈالاجائے۔ اس ضمن میں پاور ڈویژن کو ہدایت دی گئی کہ جامع لائحہ عمل تشکیل دے۔

یہ فیصلہ وزیراعظم کی زیرِ صدارت نیپرا کی جانب سے نئے ریگولیشنز کے اجراء پر منعقدہ اعلیٰ سطحی اجلاس میں کیا گیا۔ اجلاس میں نائب وزیراعظم و وزیرِ خارجہ اسحاق ڈار سمیت متعدد وفاقی وزراء اور متعلقہ اعلیٰ حکام نے شرکت کی۔