اسلام آباد: (رائیٹ ناوٴ نیوز)وزیراعظم شہباز شریف نے اعلان کیا ہے کہ پاکستان 2030 تک مصنوعی ذہانت کے شعبے میں ایک ارب ڈالر کی سرمایہ کاری کرے گا۔ یہ اعلان انہوں نے اسلام آباد میں انڈس اے آئی ویک 2026 کی افتتاحی تقریب میں کیا۔

وزیراعظم نے کہا کہ اس سرمایہ کاری کا مقصد ملک میں جامع اے آئی ایکو سسٹم کی تشکیل ہے، جس کے تحت اے آئی نصاب وفاق کے زیرانتظام اسکولوں، آزاد کشمیر، گلگت بلتستان اور بلوچستان کے دور دراز علاقوں میں متعارف کرایا جائے گا۔

انہوں نے مزید کہا کہ 1000 مکمل فنڈڈ پی ایچ ڈی اسکالرشپس فراہم کی جائیں گی اور 10 لاکھ غیر آئی ٹی پیشہ ور افراد کو اے آئی مہارتوں کی تربیت دی جائے گی۔ اس اقدام سے زراعت اور معدنیات سمیت مختلف شعبوں میں کارکردگی میں بہتری کی توقع ہے۔

وفاقی وزیر آئی ٹی شزا فاطمہ خواجہ نے تقریب سے خطاب کرتے ہوئے کہا کہ یہ ہفتہ جامعات، حکومت اور بین الاقوامی کمپنیوں کے درمیان تعاون کو فروغ دے گا۔ وزیر منصوبہ بندی احسن اقبال نے بھی اس موقع پر موجودگی ظاہر کی۔

وزیراعظم نے ماضی کے ڈیجیٹل اقدامات کا حوالہ دیتے ہوئے کہا کہ پاکستان مصنوعی ذہانت کے میدان میں عالمی برادری کے ساتھ قدم ملا کر آگے بڑھنے کے لیے تیار ہے۔