لاہور: (رائیٹ ناوٴ نیوز) صوبائی وزیر اطلاعات عظمیٰ بخاری نے کہا ہے کہ بسنت کا وقت ختم ہو چکا ہے اور اب پتنگ اڑانے کی اجازت نہیں ہوگی۔ والدین کو چاہیے کہ وہ اپنے بچوں پر نظر رکھیں کیونکہ پتنگ بازی پر سخت کارروائی کی جائے گی۔

عظمیٰ بخاری نے لاہور کے عوام اور اوورسیز پاکستانیوں کا شکریہ ادا کرتے ہوئے کہا کہ بسنت کو محفوظ اور کامیاب بنایا گیا۔ وزیراعلیٰ پنجاب مریم نواز نے بھی اس موقع پر لاہور کے عوام کی تعریف کی۔

انہوں نے کہا کہ امریکہ، برطانیہ اور مشرق وسطیٰ سے آئے مہمانوں نے لاہور میں بسنت منانے کا لطف اٹھایا۔ شہریوں نے حکومتی ہدایات پر عمل کیا جس کے باعث بسنت محفوظ رہی۔

عظمیٰ بخاری نے پولیس، ریسکیو اور ضلعی انتظامیہ کی خدمات کا بھی اعتراف کیا اور کہا کہ ان کی محنت سے بسنت محفوظ رہی۔ انہوں نے کہا کہ پاکستانی عوام نے نفرت اور احتجاج کی سیاست کو مسترد کرتے ہوئے ترقی اور خوشحالی کو ترجیح دی ہے۔