جنیوا: (رائیٹ ناوٴ نیوز) امریکا نے چین پر الزام عائد کیا ہے کہ اس نے جون 2020 میں خفیہ ایٹمی تجربہ کیا، جو بھارت اور چین کے درمیان گلوان وادی میں جھڑپوں کے چند دن بعد ہوا۔ یہ الزام جنیوا میں اسلحے کے کنٹرول سے متعلق عالمی کانفرنس کے دوران سامنے آیا، جس پر چین نے سخت ردعمل ظاہر کیا ہے۔

امریکی انڈر سیکریٹری فار آرمز کنٹرول تھامس ڈی نانو نے کانفرنس کے دوران کہا کہ امریکی حکومت کو علم ہے کہ چین نے جوہری دھماکوں پر مشتمل تجربات کیے جن میں سینکڑوں ٹن طاقت کے تجربات شامل تھے۔ انہوں نے مزید کہا کہ چین نے ایٹمی تجربات پر پردہ ڈالنے کی کوشش کی کیونکہ یہ ایٹمی تجربات پر پابندی سے متعلق وعدوں کی خلاف ورزی تھی۔

چین نے امریکی الزامات کا براہِ راست جواب نہیں دیا لیکن کہا کہ اس نے ہمیشہ جوہری امور میں ذمہ دارانہ رویہ اپنایا ہے۔ چین کا کہنا ہے کہ امریکا ہی اسلحہ کی دوڑ میں اضافے کا اصل ذمہ دار ہے۔

ماہرین کا کہنا ہے کہ نیو اسٹارٹ معاہدے کے خاتمے اور سی ٹی بی ٹی کی کمزور ہوتی حیثیت نے ایک نئی جوہری اسلحے کی دوڑ کے خدشات کو جنم دیا ہے۔