اسلام آباد: (رائیٹ ناوٴ نیوز) اسلام آباد میں پیش آنے والےدہشت گردی کے اندوہناک واقعہ کےبعدوزیراعلیٰ پنجاب مریم نواز شریف نے بسنت سے متعلق اپنی تمام سرگرمیوں میں شرکت ختم کرنے کا اعلان کیا ہے، جبکہ پنجاب حکومت نے سرکاری سطح پر بعض بسنت تقریبات منسوخ کرنے کا بھی فیصلہ کیا ہے۔

In the wake of the Islamabad tragedy, I am cancelling all my Basant-related activities that were scheduled for tomorrow. The mega Basant show at the Liberty Square also stands cancelled.

P.S: It is imperative that the nation remains united against the Khwarji menace and their…

— Maryam Nawaz Sharif (@MaryamNSharif) February 6, 2026

وزیراعلیٰ پنجاب نے سوشل میڈیا پر جاری بیان میں کہا کہ وہ کل کے لیے طے شدہ بسنت سے متعلق اپنی سرگرمیوں میں شریک نہیں ہوں گی، اور لبرٹی اسکوائر میں ہونے والے میگا بسنت شو میں بھی ان کی شرکت نہیں ہوگی۔ انہوں نے زور دیا کہ اس وقت قوم کا متحد رہنا اور دہشت گردی کے خلاف ریاستی اداروں کے ساتھ کھڑا ہونا ناگزیر ہے۔

وزیر اطلاعات پنجاب عظمیٰ بخاری نے میڈیا سے گفتگو میں کہا کہ وزیراعلیٰ کے فیصلے کے بعد بسنت سے متعلق کل کی سرکاری تقریبات منسوخ کر دی گئی ہیں، جن میں لبرٹی راؤنڈاباؤٹ پر شیڈول کنسرٹ بھی شامل ہے۔

عظمیٰ بخاری نے کہا کہ پنجاب حکومت سانحے میں جاں بحق اور زخمی افراد کے اہل خانہ کے غم میں برابر کی شریک ہے۔ ان کا کہنا تھا کہ دشمن قوتیں پاکستان کے مثبت تشخص، تہواروں اور معمولاتِ زندگی کو متاثر کرنا چاہتی ہیں، تاہم ایسی کوششوں کو کامیاب نہیں ہونے دیا جائے گا۔

وزیر اطلاعات کے مطابق پاکستانی قوم نے ماضی میں بھی دہشت گردی کا ڈٹ کر مقابلہ کیا ہے اور آئندہ بھی ان عناصر کے ناپاک عزائم کو ریاست کے خلاف کامیاب نہیں ہونے دیا جائے گا۔ انہوں نے کہا کہ قوم اور ریاست کا حوصلہ آج بھی بلند ہے۔

واضح رہے کہ لاہور میں بسنت کی دیگر سرگرمیاں حکومتی اجازت اور طے شدہ حفاظتی انتظامات کے تحت جاری ہیں، تاہم سانحے کے تناظر میں سرکاری سطح پر بعض تقریبات محدود یا منسوخ کی گئی ہیں۔