دبئی: (رائیٹ ناوٴ نیوز) ٹی ٹوئنٹی کرکٹ عموماً نوجوان کھلاڑیوں کا کھیل سمجھا جاتا ہے، مگر 7 فروری سے شروع ہونے والے ٹی ٹوئنٹی ورلڈکپ 2026 میں تجربہ کار کھلاڑیوں کی شمولیت نے ثابت کیا ہے کہ یہ فارمیٹ صرف جوانی نہیں بلکہ تجربے، سمجھداری اور ذہنی مضبوطی کا بھی تقاضا کرتا ہے۔

عمان کے آل راؤنڈر محمد ندیم 43 سال کی عمر میں سب سے بڑے عمر کے کھلاڑی ہیں، جنہوں نے 70 میچز میں 805 رنز اور 40 وکٹیں حاصل کی ہیں۔ اٹلی کے کپتان وین میڈسن 42 سال کی عمر میں شامل ہیں، جنہوں نے 7 میچز میں 205 رنز بنائے ہیں۔

رولوف وین ڈر مروے، جو جنوبی افریقا اور نیدرلینڈز کے لیے کھیل چکے ہیں، 41 برس کی عمر میں 66 میچز میں 561 رنز اور 74 وکٹیں حاصل کرچکے ہیں۔ افغانستان کے محمد نبی بھی 41 سال کی عمر میں ٹیم کے اہم کھلاڑی ہیں، جنہوں نے 147 میچز میں 2430 رنز اور 104 وکٹیں حاصل کی ہیں۔

زمبابوے کے برینڈن ٹیلر، جن کی معطلی ختم ہوچکی ہے، 40 سال کی عمر میں 58 میچز میں 1185 رنز بنا چکے ہیں اور ان کے نام ایک سنچری اور چھ نصف سنچریاں ہیں۔ ان کھلاڑیوں کی شمولیت نے واضح کیا ہے کہ ٹی ٹوئنٹی میں عمر نہیں بلکہ تجربہ اور کارکردگی اصل طاقت ہوتی ہے۔