نئی دہلی: (رائیٹ ناوٴ نیوز)بھارت اور امریکا مارچ میں ایک طویل عرصے سے زیر غور تجارتی معاہدے پر دستخط کرنے کا ارادہ رکھتے ہیں جس کے تحت بھارت امریکی مصنوعات پر ٹیرف کم کرے گا۔ بھارتی وزیر تجارت پیوش گوئل نے کہا کہ آئندہ چار سے پانچ دن میں دونوں ممالک مشترکہ بیان جاری کریں گے۔

معاہدے کے تحت واشنگٹن بھارتی برآمدات پر ڈیوٹیز 50 فیصد سے کم کر کے 18 فیصد کر دے گا۔ یہ معاہدہ امریکی صدر ڈونلڈ ٹرمپ کی جانب سے اعلان کیا گیا تھا، جس کے تحت بھارت روسی تیل کی خریداری روکنے اور تجارتی رکاوٹیں کم کرنے پر آمادہ ہوا ہے۔

پیوش گوئل نے مزید بتایا کہ بھارت آئندہ پانچ برسوں میں امریکا سے توانائی، طیاروں اور سیمی کنڈکٹرز سمیت کم از کم 500 ارب ڈالر کی خریداری کرے گا۔ معاہدہ دونوں ممالک کے تجارتی تعلقات میں اہم پیش رفت قرار دیا جا رہا ہے۔