مظفرآباد: (رائیٹ ناوٴ نیوز) وزیراعظم شہباز شریف نے یوم یکجہتی کشمیر کے موقع پر آزاد جموں و کشمیر میں خطاب کرتے ہوئے کہا کہ بھارت جس زبان میں بات کرے گا اسی میں جواب دیا جائے گا۔ انہوں نے کہا کہ پاکستان کی حکومت اور عوام کشمیریوں کے ساتھ ہیں اور کشمیر کی آزادی عظیم قربانیوں کے نتیجے میں ممکن ہوگی۔

وزیراعظم نے آزاد کشمیر قانون ساز اسمبلی کے اجلاس سے خطاب میں کہا کہ مسئلہ کشمیر کا حل کشمیری عوام کی امنگوں اور سلامتی کونسل کی قراردادوں پر عمل درآمد سے ممکن ہے۔ انہوں نے مزید کہا کہ پاکستان کشمیریوں کے حقوق خودارادیت کے مطالبے کی حمایت جاری رکھے گا۔

وزیراعظم نے کہا کہ عسکری اور سفارتی محاذ پر بھارتی جھوٹ کا بیانیہ دفن ہو چکا ہے اور بھارت اپنی شکست کے بعد دہشت گردی کرا رہا ہے۔ انہوں نے مہاجرین کا وظیفہ 3500 سے بڑھا کر 6 ہزار روپے ماہانہ کرنے اور کشمیر کے طلبہ کو لیپ ٹاپس فراہم کرنے کا اعلان کیا۔

وزیراعظم آزاد کشمیر فیصل ممتاز راٹھور نے بھی اجلاس سے خطاب کرتے ہوئے کہا کہ بھارتی فوج کشمیریوں کی سوچ پر پہرہ نہیں لگا سکتی اور دنیا کے سامنے بھارت کا مکروہ چہرہ بے نقاب ہوچکا ہے۔