واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے ہارورڈ یونیورسٹی پر ایک ارب ڈالر ہرجانے کا دعویٰ کیا ہے۔ یہ اقدام وفاقی تحقیقات کے بعد کیا گیا، جن میں یونیورسٹی کی پالیسیوں کو یہود دشمن قرار دیا گیا تھا۔

صدر ٹرمپ نے اپنے سوشل میڈیا پلیٹ فارم پر اعلان کیا کہ ہارورڈ سے مزید تعلق نہیں رہے گا اور ہرجانے کا مطالبہ کیا گیا ہے۔ انہوں نے یہ نہیں بتایا کہ یہ رقم کس بنیاد پر طے کی گئی۔

ہارورڈ یونیورسٹی نے اس معاملے پر فوری طور پر کوئی ردعمل نہیں دیا ہے۔ ٹرمپ انتظامیہ ہارورڈ سمیت دیگر جامعات پر کیمپس میں مبینہ یہود مخالف سرگرمیوں کے لیے دباؤ ڈال رہی ہے۔

غزہ جنگ کے دوران مظاہروں میں یہود مخالف نعرے بازی کی اطلاعات پر ٹرمپ انتظامیہ اور ہارورڈ کے مابین مذاکرات جاری ہیں۔ ٹرمپ نے ستمبر میں ممکنہ سمجھوتے کی بات کی تھی جس میں ہارورڈ کی جانب سے 500 ملین ڈالر کی ادائیگی شامل تھی۔

انسانی حقوق کے حلقوں نے ٹرمپ انتظامیہ کی تحقیقات پر آزادی اظہار اور تعلیمی خودمختاری کے حوالے سے تحفظات ظاہر کیے ہیں۔