نیویارک: (رائیٹ ناوٴ نیوز) ایلون مسک نے اعلان کیا ہے کہ ان کی کمپنی اسپیس ایکس نے مصنوعی ذہانت کی اسٹارٹ اپ کمپنی ایکس اے آئی کو خرید لیا ہے۔ اس انضمام کا مقصد مسک کے مصنوعی ذہانت اور خلا سے متعلق منصوبوں کو یکجا کرنا ہے، جس سے اسپیس ایکس کو ایکس اے آئی کی جدید ٹیکنالوجی تک رسائی مل جائے گی۔

ذرائع کے مطابق، اسپیس ایکس کی مجموعی قدر تقریباً ایک ٹریلین ڈالر جبکہ ایکس اے آئی کی قدر 250 ارب ڈالر ہے۔ ایکس اے آئی کے سرمایہ کاروں کو اسپیس ایکس کے شیئرز ملیں گے، جبکہ کچھ افسران نقد رقم لینے کا اختیار بھی رکھیں گے۔

یہ معاہدہ دنیا کی تاریخ کا سب سے بڑا انضمام تصور کیا جا رہا ہے، جو پہلے ووڈا فون کے پاس تھا۔ تجزیہ کاروں کے مطابق، یہ اسپیس ایکس کو ڈیٹا سینٹرز اور مصنوعی ذہانت میں مضبوط بنا سکتا ہے۔

معاہدے کے بعد، اسپیس ایکس کی شیئر قیمت 527 ڈالر فی شیئر متوقع ہے۔ ایلون مسک نے کہا کہ یہ معاہدہ ایک نئی کتاب کا آغاز ہے جس کا مقصد انسانی شعور کو ستاروں تک پھیلانا ہے۔