اسلام آباد: (رائیٹ ناوٴ نیوز) پاکستان کی برآمدات میں جنوری کے مہینے میں 3.73 فیصد اضافہ ہوا ہے، جس سے برآمد کنندگان کو جزوی ریلیف ملا ہے اور بیرونی تجارت میں ممکنہ بحالی کی امید پیدا ہوئی ہے۔ پاکستان بیورو آف اسٹیٹسٹکس کے مطابق، جنوری میں برآمدی آمدن 3.061 ارب ڈالر رہی، جو گزشتہ سال کے اسی مہینے میں 2.951 ارب ڈالر تھی۔ ماہانہ بنیاد پر یہ اضافہ 34.96 فیصد رہا۔

رواں مالی سال میں جولائی سے دسمبر تک برآمدات میں منفی نمو ریکارڈ کی گئی تھی۔ حکومت نے برآمدی شعبے کو سہولت دینے کے لیے بجلی کے نرخ اور وہیلنگ چارجز میں کمی جیسے اقدامات کا اعلان کیا ہے۔ وزیراعظم شہباز شریف نے برآمدی ری فنانس ریٹ بھی 7.5 فیصد سے کم کر کے 4.5 فیصد کر دیا ہے۔

جنوری میں درآمدات 5.786 ارب ڈالر تھیں، جو گزشتہ سال کے اسی مہینے میں 5.904 ارب ڈالر تھیں، یوں سالانہ بنیاد پر 1.4 فیصد کمی ہوئی۔ تاہم، تجارتی خسارہ بدستور ایک بڑا چیلنج ہے، جو جولائی سے جنوری کے دوران 28.22 فیصد اضافے کے ساتھ 22.038 ارب ڈالر تک پہنچ گیا۔