واشنگٹن: (رائیٹ ناوٴ نیوز) امریکی صدر ڈونلڈ ٹرمپ نے امید ظاہر کی ہے کہ ایران کے ساتھ معاہدہ ممکن ہے، جبکہ ایرانی رہبرِ انقلاب نے امریکا کی کسی بھی حملے کی صورت میں پورے خطے کے جنگ کی لپیٹ میں آنے کا انتباہ دیا ہے۔

اتوار کو صحافیوں سے گفتگو کرتے ہوئے ٹرمپ نے کہا کہ موجودہ حالات میں ایسے بیانات متوقع ہیں اور امید ہے کہ دونوں ممالک معاہدے پر پہنچ جائیں گے۔ تاہم، معاہدہ نہ ہونے کی صورت میں آئندہ صورتحال واضح ہو جائے گی۔

امریکا نے حالیہ ہفتوں میں مشرقِ وسطیٰ میں اپنی بحری موجودگی میں اضافہ کیا ہے۔ یہ اقدام ایران پر دباؤ بڑھانے اور ممکنہ مداخلت کے بیانات کے بعد کیا گیا ہے۔

ایران میں دسمبر کے اواخر میں معاشی مشکلات کے خلاف مظاہرے شروع ہوئے جو بعد میں سیاسی نوعیت اختیار کر گئے۔ حکومتی اقدامات کے بعد ان مظاہروں کی شدت میں کمی آئی۔

ایرانی رہبرِ انقلاب نے مظاہروں کو امریکا اور اسرائیل کی حمایت یافتہ سازش قرار دیا، جس کا مقصد ریاستی اداروں کو نشانہ بنانا تھا، اور خبردار کیا کہ امریکا کے حملے کی صورت میں تصادم علاقائی جنگ میں تبدیل ہو سکتا ہے۔