ممبئی: (رائیٹ ناوٴ نیوز) بالی ووڈ ڈائریکٹر روہت شیٹی کے گھر کے باہر فائرنگ کا واقعہ پیش آیا جس کے بعد علاقے میں خوف و ہراس پھیل گیا۔

نامعلوم افراد نے ممبئی کے علاقے جُہو میں روہت شیٹی کی رہائش گاہ کے باہر فائرنگ کی، تاہم کوئی جانی نقصان نہیں ہوا۔ پولیس نے واقعے کے فوراً بعد موقع پر پہنچ کر شواہد اکٹھے کیے اور سیکیورٹی سخت کر دی۔

اس فائرنگ کی ذمہ داری لارنس بشنوئی گینگ نے قبول کی ہے۔ سوشل میڈیا پر جاری بیان میں گینگ نے کارروائی کا دعویٰ کیا اور روہت شیٹی کو دھمکیاں دیں۔

ممبئی پولیس اور کرائم برانچ نے تحقیقات شروع کر دی ہیں اور سی سی ٹی وی فوٹیج کا جائزہ لیا جا رہا ہے۔ پولیس کا کہنا ہے کہ جلد ذمہ داروں کو گرفتار کیا جائے گا۔

گزشتہ سال سلمان خان کی رہائش گاہ پر بھی فائرنگ ہوئی تھی جس میں لارنس بشنوئی گینگ ملوث تھا، اب اسی گینگ نے روہت شیٹی کے گھر پر حملہ کیا ہے۔