کوئٹہ: (رائیٹ ناوٴ نیوز) بلوچستان کے مختلف علاقوں میں سیکیورٹی فورسز نے دہشت گرد حملے ناکام بناتے ہوئے 92 دہشت گردوں کو ہلاک کر دیا ہے جبکہ کارروائیوں میں 15 سیکیورٹی اہلکار اور 18 شہری شہید ہوئے ہیں۔ پاک فوج کے شعبہ تعلقات عامہ (آئی ایس پی آر) کے مطابق دہشت گردوں نے مختلف شہروں میں منصوبہ بندی کے تحت حملے کیے تھے، تاہم سیکیورٹی فورسز نے بروقت کارروائی کرتے ہوئے ان کے عزائم ناکام بنا دیے۔

آئی ایس پی آر نے بتایا کہ کلیئرنس آپریشن کے دوران دہشت گردوں کا بیرون ملک موجود اپنے ہینڈلرز سے رابطہ تھا اور یہ کارروائیاں بیرون ملک سرغناؤں کی ہدایت پر کی گئیں۔ بیان میں کہا گیا کہ ان کارروائیوں کے منصوبہ سازوں کو قانون کے کٹہرے میں لایا جائے گا اور آپریشن جاری رہیں گے۔

وزیراعلیٰ بلوچستان میر سرفراز بگٹی نے کہا کہ دہشت گردوں کے خلاف آپریشن تقریباً مکمل ہو چکا ہے، جبکہ وزیرداخلہ محسن نقوی نے دہشت گرد حملوں کے پیچھے بھارت کے کردار کی نشاندہی کی۔ سعودی عرب نے ان حملوں کی مذمت کی ہے اور پاکستانی حکومت کے ساتھ یکجہتی کا اظہار کیا ہے۔