اسلام آباد: (رائیٹ ناوٴ نیوز)حکومت نے ڈیزل کی قیمت میں متوقع اضافے کے اثرات کو کم کرنے کے لیے پیٹرول پر ٹیکس بڑھانے پر غور شروع کر دیا ہے۔ اگر ڈیزل کی قیمت میں اضافہ کیا گیا تو پیٹرول پر اضافی ٹیکس عائد کیا جا سکتا ہے۔

علاقائی کشیدگی کے باعث عالمی منڈی میں خام تیل کی قیمتوں میں معمولی اضافہ ہوا ہے، جس کی وجہ سے ہائی اسپیڈ ڈیزل کی قیمتیں آئندہ پندرہ دن کے لیے بلند سطح پر رہنے کا امکان ہے۔ ان قیمتوں کے تعین کے دوران ڈیزل، مٹی کے تیل اور لائٹ ڈیزل آئل کی قیمتوں میں اضافے کا خدشہ ہے۔

موجودہ ٹیکس شرحوں کے تحت ہائی اسپیڈ ڈیزل کی قیمت میں تقریباً 9.50 روپے فی لیٹر اضافہ متوقع ہے، جبکہ مٹی کے تیل اور لائٹ ڈیزل آئل کی قیمتوں میں بالترتیب 3.7 فیصد اور 5 فیصد اضافہ ہو سکتا ہے۔ اس کے برعکس پیٹرول کی قیمت میں 0.40 روپے فی لیٹر کمی کا امکان ہے۔

حکومت کو مشورہ دیا جا رہا ہے کہ ڈیزل کی قیمت میں متوقع اضافے کا بوجھ پیٹرول پر منتقل کیا جائے، تاکہ مہنگائی کو قابو میں رکھا جا سکے۔ فی الحال پیٹرول پر 105 روپے فی لیٹر اور ڈیزل پر 96 روپے فی لیٹر ٹیکس وصول کیا جا رہا ہے۔