کراچی: (رائیٹ ناوٴ نیوز) سردیوں میں چہرے کی رنگت ماند پڑنے کی کئی وجوہات ہیں۔ خشکی، خون کی گردش میں کمی، دھوپ کی قلت اور پانی کم پینا اس کی بڑی وجوہات ہیں۔

سردی کے موسم میں فضا میں نمی کم ہو جاتی ہے، جبکہ تیز اور خشک ہوائیں جلد کی قدرتی نمی کو چھین لیتی ہیں۔ اس کے نتیجے میں جلد کھنچی کھنچی محسوس ہوتی ہے اور چہرہ بے جان نظر آتا ہے۔

جسم اہم اعضا کو گرم رکھنے کے لیے جلد کے قریب خون کی روانی کم کر دیتا ہے جس سے رنگت قدرتی طور پر پھیکی دکھائی دیتی ہے۔ دھوپ کی کمی وٹامن ڈی کی سطح کو متاثر کرتی ہے، جس سے جلد کی صحت پر اثر پڑتا ہے۔

بہت زیادہ گرم پانی سے چہرہ دھونا جلد کی حفاظتی تہہ کو نقصان پہنچاتا ہے، اس سے خشکی بڑھتی ہے اور جلد کی چمک ختم ہونے لگتی ہے۔

سردیوں میں رنگت بحال رکھنے کے لیے نیم گرم پانی سے منہ دھوئیں، اچھا موئسچرائزر استعمال کریں اور دھوپ میں چند منٹ گزاریں۔ دو سے تین لیٹر پانی پینا بھی مفید ہے۔