عمر ایوب نے قانونی اور سیاسی مصروفیات کے باعث پی ٹی آئی پولیٹیکل کمیٹی میں شامل ہونے سے انکار کر دیا ہے۔
اسلام آباد: (رائیٹ ناوٴ نیوز)پاکستان تحریک انصاف کی پولیٹیکل کمیٹی سے سابق قائد حزب اختلاف عمر ایوب خان اور سینیٹر شبلی فراز نے استعفیٰ دے دیا ہے۔ دونوں رہنماؤں نے کمیٹی میں شمولیت سے معذرت کرتے ہوئے اپنے فیصلے سے پارٹی قیادت کو آگاہ کر دیا۔
عمر ایوب خان نے سماجی رابطے کی ویب سائٹ ایکس پر جاری بیان میں کہا کہ قانونی اور سیاسی مصروفیات کے باعث وہ پولیٹیکل کمیٹی میں مؤثر کردار ادا کرنے کی پوزیشن میں نہیں ہیں۔ ان کا کہنا تھا کہ چونکہ وہ اس وقت نہ رکنِ پارلیمنٹ ہیں اور نہ ہی کسی پارٹی عہدے پر فائز ہیں، اس لیے پولیٹیکل کمیٹی کی رکنیت صرف موجودہ عہدیداران تک محدود ہونی چاہیے۔
Dear Barrister Salman Akram Raja sahib.
1. I am most grateful to you for including my name in the newly constituted Political Committee despite my request not to include my name as I am no longer a member of parliament or an office holder of PTI.
2. I would once again humbly…— Omar Ayub Khan (@OmarAyubKhan) January 28, 2026
عمر ایوب خان نے پارٹی کے بانی چیئرمین عمران خان کے ساتھ اپنی وابستگی کا اعادہ کرتے ہوئے کہا کہ وہ ان کے کارکن تھے، ہیں اور رہیں گے۔ انہوں نے اپوزیشن لیڈر محمود خان اچکزئی کو پولیٹیکل کمیٹی میں شامل کرنے کی سفارش بھی کی۔
دوسری جانب سینیٹر شبلی فراز نے بھی پولیٹیکل کمیٹی سے استعفیٰ دیتے ہوئے شمولیت سے معذرت کر لی۔ ذرائع کے مطابق دونوں رہنماؤں نے اپنے استعفے پارٹی کے سیکریٹری جنرل سلمان اکرم راجہ کو ارسال کیے ہیں۔
واضح رہے کہ دونوں رہنماؤں کی جانب سے یہ تجویز دی گئی ہے کہ پارٹی کی پولیٹیکل کمیٹی میں صرف موجودہ آفس ہولڈرز کو شامل کیا جائے تاکہ تنظیمی اور پارلیمانی معاملات بہتر اور مؤثر انداز میں چلائے جا سکیں۔
