بیجنگ: (رائیٹ ناوٴ نیوز) چین کے صدر شی جن پھنگ نے بیجنگ میں فن لینڈ کے وزیرِاعظم پیٹیری اورپو سے ملاقات کے دوران اقوام متحدہ کو مرکز بنا کر قائم عالمی نظام کے تحفظ کے لیے چین کے عزم کا اظہار کیا۔

صدر شی جن پھنگ کے یہ ریمارکس امریکی صدر ڈونلڈ ٹرمپ کے ‘بورڈ آف پیس’ کے قیام کے اعلان کے بعد سامنے آئے ہیں، جسے اقوام متحدہ کے متبادل فورم کے طور پر دیکھا جا رہا ہے۔ چینی صدر نے کہا کہ چین فن لینڈ کے ساتھ مل کر اقوام متحدہ کے مرکز پر مبنی بین الاقوامی نظام کے دفاع کے لیے کام کرنے کو تیار ہے۔ اگرچہ چین کو ٹرمپ کے فورم میں شمولیت کی دعوت دی گئی ہے، تاہم بیجنگ نے ابھی تک اس میں شرکت کی تصدیق نہیں کی۔

فن لینڈ کے وزیرِاعظم نے عالمی امور اور دوطرفہ تعاون پر بات چیت میں دلچسپی ظاہر کی۔ ان کا یہ دورہ ایسے وقت میں ہو رہا ہے جب مغربی رہنما امریکا کی پالیسیوں میں تبدیلی کے تناظر میں چین سے روابط بڑھا رہے ہیں۔ چین اور فن لینڈ کے درمیان یوکرین کی جنگ اور آرکٹک خطے میں اثر و رسوخ کے معاملات پر اختلافات بھی موجود ہیں۔ چین یوکرین تنازع میں غیر جانبدار ہے اور روس کی کارروائی کی مذمت نہیں کی گئی۔