تہران: (رائیٹ ناوٴ نیوز) ایران کی وزارت دفاع کے ترجمان بریگیڈیئر جنرل رضا طلائی نِک نے کہا ہے کہ ایران نے اسرائیل کے ساتھ گزشتہ سال کی جنگ کے بعد اپنی میزائل صلاحیت کو مزید مضبوط اور جدید بنایا ہے۔ انہوں نے کہا کہ جنگ کے بعد میزائلوں کی تعداد اور ان کی صلاحیت میں نمایاں اضافہ ہوا ہے۔

ہفتے کے روز تسنیم نیوز ایجنسی سے بات کرتے ہوئے انہوں نے مزید کہا کہ ایران کی میزائل قوت کی مقداری اور معیاری صلاحیت میں اضافہ ہوا ہے جبکہ جنگی تجربات کے بنیاد پر ان کی دفاعی صلاحیت بھی مضبوط کی گئی ہے۔

بریگیڈیئر جنرل نے مزید کہا کہ ایران نے ابھرتے ہوئے خطرات کے جواب میں جدید میزائل صلاحیتیں تیار کی ہیں، تاہم یہ تفصیلات خفیہ رکھی جائیں گی تاکہ دشمن کو حیران کیا جا سکے۔

انہوں نے حالیہ فوجی دھمکیوں کو مسترد کرتے ہوئے کہا کہ دشمن کی بیان بازی اس کے خوف کی عکاسی کرتی ہے۔ ایرانی حکام کے مطابق اسرائیل کے خلاف جنگ میں ایرانی میزائلوں نے مقبوضہ علاقوں میں اہداف کو دقیق نشانہ بنایا۔

فوجی ماہرین کا کہنا ہے کہ ایرانی میزائل حملوں کی مؤثریت وہ عنصر تھا جس نے امریکا کو جنگ بندی پر آمادہ کیا۔ ایرانی حکام نے واضح کیا ہے کہ اگر امریکا نے حملہ کیا تو خطے میں امریکی مفادات کو نشانہ بنایا جائے گا۔