ڈیووس: (رائیٹ ناوٴ نیوز) امریکی وزیر خارجہ مارکو روبیو نے عالمی اقتصادی فورم کے اجلاس میں کہا ہے کہ غزہ کے لیے قائم کیا گیا بورڈ آف پیس صرف امن کی علامت نہیں بلکہ عملی اقدامات کا فورم ہے۔ انہوں نے بورڈ آف پیس کی دستخطی تقریب کے موقع پر یہ بات کہی۔

مارکو روبیو نے کہا کہ اس بورڈ کے امکانات بے شمار ہیں اور بنیادی توجہ غزہ میں طے پانے والے امن معاہدے کی دیرپائی پر ہے، جو دنیا کے دیگر خطوں کے لیے ایک قابل عمل ماڈل بن سکتا ہے۔

انہوں نے مزید کہا کہ یہ عالمی رہنماؤں کا گروپ عملی فیصلوں پر یقین رکھتا ہے اور ڈونلڈ ٹرمپ جیسے صدر کام کو عملی شکل دینے پر زور دیتے ہیں۔

مارکو روبیو کے مطابق غزہ کے مستقبل کے لیے پیش کیا گیا منصوبہ امید افزا اور قابل حصول ہے، بشرطیکہ اس پر مطلوبہ محنت اور وقت صرف کیا جائے۔

انہوں نے ان عالمی رہنماؤں اور ممالک کا شکریہ ادا کیا جنہوں نے بورڈ آف پیس میں شمولیت کا اعلان کیا یا آئندہ شامل ہونے کا ارادہ رکھتے ہیں۔