ابوظبی: (رائیٹ ناوٴ نیوز) متحدہ عرب امارات نے آرٹیفیشل انٹیلیجنس کی مدد سے مصنوعی بارش کے ذریعے پانی کی قلت کو دور کرنے کا منصوبہ پیش کیا ہے۔ یہ منصوبہ کلاؤڈ سیڈنگ کے تحت تیار کیا گیا ہے، جس کے لیے 15 لاکھ ڈالر کے تحقیقی گرانٹس جاری کیے گئے ہیں۔

متحدہ عرب امارات کے حکام نے بتایا ہے کہ امریکا، جرمنی اور آسٹریلیا کے سائنسدان اس منصوبے پر تحقیق کریں گے، اور اماراتی نیشنل سینٹر آف میٹرولوجی کے تحت ان سائنسدانوں کا انتخاب کیا گیا ہے۔ 48 ممالک سے موصول ہونے والی 140 تجاویز میں سے 3 سائنسدانوں کو منتخب کیا گیا ہے۔

ہر سائنسدان کو ایک سال میں زیادہ سے زیادہ 5 لاکھ 50 ہزار ڈالر کی گرانٹ دی جائے گی، اور یہ عمل آئندہ 3 سال تک جاری رہے گا۔ اس دوران مصنوعی بارش میں آرٹیفیشل انٹیلیجنس کا استعمال کرتے ہوئے بارش بڑھانے کی جدید ٹیکنالوجی پر تحقیق ہوگی۔

اماراتی حکام کا کہنا ہے کہ آرٹیفیشل انٹیلیجنس کی مدد سے درست بادلوں کا انتخاب کیا جائے گا، جس سے بہتر نتائج حاصل ہوں گے۔ متحدہ عرب امارات میں سالانہ بارش کی مقدار بہت کم ہوتی ہے، اور زیادہ تر پانی سمندری نمکین پانی کو صاف کر کے حاصل کیا جاتا ہے۔