پشاور: (رائیٹ ناوٴ نیوز) خیبرپختونخوا کے وزیراعلیٰ محمد سہیل آفریدی نے کہا ہے کہ جعلی حکومت آمریت کے تمام ریکارڈ توڑ رہی ہے اور عمران خان کو سردی کا سامان فراہم نہ کرنے پر مذمت کی ہے۔ انہوں نے صوبائی کابینہ کے اجلاس میں کہا کہ عمران خان اور بشریٰ بی بی کو تنہائی میں رکھنا اور ملاقاتوں سے روکنا ظلم ہے۔

سہیل آفریدی نے کہا کہ خیبرپختونخوا کے ساتھ امتیازی سلوک ہو رہا ہے اور ایکشن ان ایڈ آف سول پاور واپس لینے کے عمل میں تاخیر وفاق کی جانب سے دہشت گردوں کی حراستی مراکز کی تفصیلات نہ ملنے کے باعث ہو رہی ہے۔ انہوں نے وفاقی حکومت پر نادرن بائی پاس منصوبے میں تاخیر اور لاگت بڑھنے کا الزام بھی لگایا۔

وزیراعلیٰ نے کہا کہ وفاقی حکومت ٹی ڈی پیز کے وعدہ شدہ فنڈز نہیں دے رہی اور صوبائی حکومت نے 7.5 ارب روپے اپنی جیب سے خرچ کیے ہیں۔ ریڈیو پاکستان واقعے کو پی ٹی آئی کے خلاف سازش قرار دیتے ہوئے تحقیقات کے لیے کمیٹی قائم کی گئی ہے۔